Vestfirðir á miðöldum
Um er að ræða þriggja kvölda námskeið þar sem fjallað verður um Vestfirði á miðöldum og er námskeiðið í tengslum við verkefnið Vestfirðir á miðöldum.
Námskeiðið skiptist í þrennt:
1. Landnám og söguöld
27. mars kl. 19:30-21:00
Farið verður yfir heimildir um landnám, gerð grein fyrir uppgreftrinum í Vatnsfirði í Djúpi og öðrum fornleifafundum fyrir vestan. Fjallað verður um Íslendingasögur sem gerast á Vestfjörðum, einkenni þeirra og hvað þær geta sagt okkur um lífið fyrir vestan í kringum kristni-töku.
2. Baráttan um Vestfirði á Sturlungaöld
29. mars kl. 19:30-21:00
Samtíðarsögur segja frá miklum átökum um yfirráð yfir Vestfjörðum á Sturlungaöld. Fyrst voru það heimamenn sem deildu, m.a. Hrafn Svein-bjarnarson og Þorvaldur Snorrason Vatnsfirðingur. Síðan færðust þessi átök út fyrir kjálkann. Þá deildu Sturlungar innbyrðis eða við Ásbirninga. Þessi saga verður rakin og reynt að rýna í hugsanlegar ástæður fyrir því hvers vegna Vestfirðir urðu bitbein í átökum valdamanna á þessu skeiði Íslandssögunnar.
3. Tími ríkra manna á síðmiðöldum
30. mars kl.19:30-21:00
Á síðmiðöldum (14.-16.öld) safnaðist mikill auður á hendur fárra manna á Vestfjörðum. Rakin verður saga þessara manna, Eiríks Sveinbjarnarsonar í Vatnsfirði, Björns Jórsalafara, Guðmundar Arasonar á Reykhólum, o.fl og ræddar hugmyndir fræðimanna um uppruna þessa auðs og hvað varð af honum.
