Frekari upplýsingar eru á ensku.



Námskeiðslýsing
 

Námskeiðið er ítarleg en hröð kynning á tungumáli Eddukvæðanna og Íslendingasagnanna sem og á norrænum miðaldabókmenntum. Námskeiðinu er ætlað að mæta kröfum nema í norrænum málum og/eða forníslensku sem og annarra sem vilja sameina tungumálanám og lestur fornsagna.

Í tungumálanáminu verður aðaláherslan lögð á sögu og uppbyggingu íslenskunnar að fornu. Í fyrstu vikunni verður lögð nokkur áhersla á nútímaíslensku þ.a. þátttakendurnir öðlist betri skilning á íslenskunni sem töluð er í dag, bæði hvað varðar hljóðfræði og málfræði sem og framburð í nútímaíslensku.

Meðfram tungumálanáminu munu þátttakendur lesa Gísla sögu. Gísla saga verður þó ekki bara lesin til textarannsókna og skilnings heldur munu þátttakendur fá að kynnast sögusviði sögunnar með vettvangsferðum í Haukadal og Geirþjófsfjörð. Þátttakendurnir munu auk þess fá góða tilfinningu fyrir lífinu á tímum Gísla sögu, s.s. vopnum, húsbúnaði o.fl.

Kennslan fer fram í Háskólasetri Vestfjarða. Nemendur ljúka samtals 76 fjölbreyttum kennslustundum, bæði í hefðbundnum kennslustofum, á áhugaverðum fyrirlestrum og í spennandi dagsferðum. Meðal annars verður farið í ferð á söguslóðir Gísla sögu þar sem boðið verður upp á einleik Elfars Loga Hannessonar úr Gísla sögu og Dr. William Short mun kynna vopnabúnað á tímum Íslendingasagnanna og margt fleira.

Námskeiðið er bæði kennt á ensku og þýsku. 

Afþreyingardagskrá
 

Á Ísafirði eru í boði margskonar afþreying, s.s. skipulagðar ferðir af ýmsu tagi. Þessar ferðir eru ekki innifaldar í námskeiðsgjaldinu.

Á Ísafirði finna nemendur fjölda áhugaverðra staða, þar eru kaffihús, veitingastaðir og skemmtistaðir. Þar er líka sundlaug, golfvöllur og margt fleira auk þess sem náttúran í kring býður upp á ýmsa möguleika. Þátttaka í daglegu lífi í litlu bæjarfélagi á landsbyggðinni eins og Ísafirði auðveldar nemendum að fá tilfinningu fyrir íslensku tungumáli sem og samfélagi.

Hér er um að ræða áhugavert sumarnámskeið í fallegri náttúru Vestfjarða. Háskólasetur Vestfjarða hefur reynslu af því að halda íslenskunámskeið fyrir erlenda stúdenta og borgara og býður nemendur hjartanlega velkomna.

Fyrir frekari upplýsingar vinsamlegast hafið samband, islenska@uwestfjords.is.