Í vikunni hófust tvö ný valnámskeið í haf- og strandsvæðastjórnunar meistaranáminu. Þetta eru síðustu námskeiðin fyrir páskafrí en að fríinu loknu taka við þrjár síðustu þriggja vikna kennsluloturnar. Í kjölfar þeirra snúa nemendur sér alfarið að vinnu við lokaritgerðir sínar.

Námskeiðin sem hófust í vikunni fjalla um mengun haf- og strandsvæða (Pollution in the Coastal and Marine Environment) og mat á umhverfisáhrifum (Environmental Assessment). Bæði námskeiðin hafa á að skipa nýjum kennurum, auk kennara sem áður hafa starfað við Háskólasetrið. Mengunarnámskeiðið kennir, líkt og á síðasta ári, Dr. Hrönn Jörundsdóttir, verkefnastjóri hjá Matís, en í ár kennir Dr. Helga Gunnlaugsdóttir, fagstjóri hjá Matís, einnig í námskeiðinu. Hitt námskeiðið, um mat á umhverfisáhrifum, er líkt og undanfarin ár kennt af Gunnari Páli Eydal, umhverfisfræðingi hjá Teiknistofunni Eik á Ísafirði, en samkennari hans í ár er Ólafur Árnason sérfræðingur í mati á umhverfisáhrifum hjá EFLA verkfræðistofu.

Við bjóðum þau Helgu og Ólaf sérstaklega velkomin til starfa við Háskólasetur Vestfjarða.