Vel heppnuðu málþingi um skipulag og stjórnun strandsvæða lauk föstudaginn 4. september með fyrirlestrum tveggja erlendra gesta, þeirra Lorriane Gray frá NAFC Marine Centre á Hjaltlandi og Claire M. O´Neill frá Cinqe Terra þjóðgarðinum á Ítalíu.

Á málþinginu tók einnig til máls Rodrigo Menafra kennari við Háskólasetur Vestfjarða sem kynnti haf- og strandsvæðastjórnun og -skipulag í Kanada. Auk þess tóku til máls innlendir sérfræðinga frá Háskólasetri Vestfjarða, Háskóla Íslands, Matís, Orkustofnun, Umhverfisstofnun, Skipulagsstofnun, Teiknistofunni Eik, Sjávarútvegsþjónustunni og Sjávarútvegs- og Landbúnaðarráðuneytinu. Þessi fjölbreytti hópur fyrirlesara gefur ágætlega til kynna hve fjölþætt skiplag og stjórnun haf- og strandsvæða er. Enda var markmið málþingsins var að gefa gott yfirlit yfir stjórnunarfyrirkomulag þessara svæða á Íslandi, jafnframt því að veita innsýn í hvernig haldið er á málefnum haf- og strandsvæða annarsstaðar í heiminum.

Þeir sem hafa áhuga á að kynna sér efni málþingsins betur geta skoðað skyggnur flestra fyrirlestranna, sem nú eru aðgengilegar á vefnum, auk skyggna úr kynningum sem þrír hópar meistaranemar héldu á málþinginu.