Nú er að ljúka námskeiðinu Aðferðafræði (Applied Methodology), en það er skyldunámskeið í haf- og strandsvæðastjórnun. Aðalkennari þess er Albertína Friðbjörg Elíasdóttir. Í námskeiðinu læra nemendur helstu undirstöðuatriði rannsóknaaðferða, og er lögð áhersla á aðferðir sem algengar eru í þverfræðilegum rannsóknum.

Albertína Friðbjörg er með BA í félagsfræði frá Háskóla Íslands (2005) og er að ljúka MSc í mannvistarlandfræði frá sama skóla. Hún hefur starfað við Háskólasetur Vestfjarða sem verkefnastjóri síðan í byrjun árs 2010, en hún hefur jafnframt kennt síðustu þrjú ár í frumgreinanámi Háskólans í Reykjavík í samvinnu við Háskólasetur Vestfjarða. Í námi sínu við Háskóla Íslands hefur hún lokið sjö áföngum í aðferðafræði þar sem ýmsum tegundum rannsóknaraðferða hafa verið gerð ítarleg skil.

Námskeiðinu lýkur með veggspjaldasýningu þar sem nemendur kynna rannsóknir sem þau unnu í tengslum við námskeiðið. Margar þessara rannsókna fjalla um viðhorf heimamanna á Vestfjörðum til umhverfismála; gjarnan samanborið við aðra hópa. Plakötin eru áfram til sýnis og eru áhugasamir hvattir til að koma við í húsakynnum í Háskólasetursins og kynna sér efni þeirra.